萬眾期待嘅《衝上雲霄II》今晚首播，好多視迷都讚張智霖飾演嘅 「Cool魔」好型﹑馬國明傻氣搞笑﹑吳鎮宇好Chok，應該有唔少女士被電暈，第一集都幾好睇，輕鬆又搞笑，似乎有追看潛力。
雖然劇情演員都過關，不過
首主題曲的確係出曬事，唔係話林子祥（阿Lam）唱得唔好，而係珠玉在前，陳奕迅（Eason）嘅《歲月如歌》真係好fit個劇，「天氣不似預期，但要走，總要飛。」入曬腦兼入曬骨，但0依家呢首主題曲....唉....真係同套劇格格不入，除咗充滿80年代色彩外，仲好有《男兒當自強》feel，最弊今集播完時，片尾都係播呢首歌，令好多人都大為失望，以為主題曲「走唔甩」、片尾曲都應該走得甩，會播《歲月如歌》啦，點知又一次失望。
唔少網民都係高登討論區洗版式喪開PO討論呢首歌，好多留言都好唔客氣，負評多多，仲要聽足43集，點算好呢？有網民認為首歌充滿武俠劇色彩：「一聽首歌以為無線播八十年代舊武俠片。」有網民仲話阿Lam首主題曲仲難聽過黃宗澤，甚至問點解唔搵張如城唱喎，哇﹗有冇咁誇呀？
有網民睇唔過眼，除咗不斷開post要求無線重用《歲月如歌》做主題曲之外，亦有人索性再次DIY，將Eason《歲月如歌》套入《衝上雲霄II》作為主題曲，果然順耳好多，呢條link火速瘋傳，而網民仲留言激讚：「終於冇曬墜機的感覺 」﹑「終於安全」﹑「Good job!個feel返哂泥！！」﹑「夾到喊」﹑「完全係歌劇合一，cctvb你幾時先很醒呀！」及「呢D就係一套戲嘅靈魂」等等。
都有人話，就算唔用《歲月如歌》，都可以用Cool魔張智霖喺飛機上唱嘅《Fly me to the moon》，真係好好聽又有mood。
